آغاز تمرینات نظامی از سوی روسیه و تاجیکستان علیه حملات احتمالی طالبان

گزارش‌ها از همسایه‌گی افغانستان در شمال کشور می‌رسانند که کشورهای روسیه و تاجیکستان، تمرین‌های نظامی شان را به‌خاطر حمله‌های احتمالی گروه طالبان آغاز کرده‌اند.

وزارت دفاع تاجیکستان در صحبت با رسانه‌ها تایید کرده‌است که دوشنبه و مسکو تمرین‌های نظامی شان در نزدیک مرز افغانستان به‌خاطر آماده‌گی در برابر حمله‌های احتمالی طالبان آغاز کرده‌اند.

گزارش‌ها می‌رسانند که در این تمرین‌های نظامی، ۱۰ هزار سرباز دولت تاجیکستان اشتراک کرده‌اند.

از سوی هم، وزارت دفاع تاجیکستان افزوده که در تمرین‌های نظامی، ۴ صد سرباز روس نیز اشتراک داشته که دست‌‎کم در آن، ۸۰ عراده وسایط نقلیۀ مورد استفاده قرار گرفته‌است.

کشورهای روسیه و تاجیکستان در مورد افزایش ساحۀ نفوذ گروه داعش در شمال کشور و حملات احتمالی آن گروه بر کشورهای آسیایی چیزی نگفته‌اند.

این درحالی‌ست که فعالیت‌های گروه‌های داعش و طالبان در شمال افغانستان با گذشت هروز، افزایش می‌یابد که تهدید‌های جدی را متوجۀ همسایه‌گان شمالی افغانستان ساخته‌است.

هرچند در این اواخر، عملیات‌های گوناگون به‌خاطر نابودی گروه‌های هراس‌افگن در شمال کشور راه‌اندازی شدند، اما هنوز هم دیده می‌شود که فعالیت‌های دهشت‌افگنان در ولایت‌های شمالی به شکل گسترده جریان دارند.

باید گفت که درحال حاضر در ولایت‌های بدخشان، قندز، فاریاب و تخار جنگ میان گروه‌ طالبان و نیروهای دولتی به شدت جریان دارد و هرازگاهی هراس‌افگنان بالای ولایت‌های سمنگان، بغلان، سرپل و بلخ نیز حمله‌های تهاجمی شان را راه‌اندازی می‌کنند.